Recital poético musical Novas Voces

Parece que o insigne Lope de Vega estaba errado cando dixo: “Galicia nunca fértil en poetas”, se nos atemos á estensa nómina de voces que están a renovar a produción literaria galega nos últimos anos.

O recital poético deste ano, que unha vez máis fixemos man a man co Departamento de Música, quere recoñecer as voces particulares destes autores e autoras que conseguiron abrir camiños inéditos na poesía, conformando un plural panorama onde conflúen estilos, sensibilidades e intereses enormemente diversos. 

Como toda escolla significa renuncia tivemos que prescindir dalgúns nomes. Poesías de Cristal Méndez, Martín Veiga, Baldo Ramos, Fran Alonso, Ana Romaní, Olga Novo, Estevo Creus , María Lado ou a portuguesa Sophia de Mello Breyner foron interpretadas por alumnos e alumnas de 2º, 3º e 4º de ESO. 

E ademais quixemos facerlles un lugar a dous xóvenes poetas, alumnos do noso centro, que xa andan na procura da arte das palabras.

Se queres descargalo clica aquí.

Cidades from ENDL Poio on Vimeo.

Há mulheres from ENDL Poio on Vimeo.

Pasaxe musical from ENDL Poio on Vimeo.

Branco from ENDL Poio on Vimeo.

Correlingua 2015

Pontevedra pechou nesta ocasión a edición 2015 do Correlingua que se desenvolveu ao longo do mes de maio en doce bisbarras galegas.

Esta proposta de carácter lúdico-educativo busca que os mozos participen nun acto público para reivindicar o dereito a crecer en galego. A carreira finalizou cunha festa final na Praza da Ferrería conducida polo cantante Xurxo Souto, de Os Diplomáticos deMonte Alto, e coa actuación musical do grupo Bocinazo que fixo versións de distintos temas, entre eles, 'A ritmo de garaxe' de Loquillo.

Obradoiro de portugués

Outro ano máis os nosos alumnos puideron achegarse ao portugués, a nosa irmá do sur. Con este obradoiro constataron a vantaxe que como falantes de galego temos para a comprensión e a expresión da lingua portuguesa  e tamén por outro lado, serviu para poñer fin a certos prexuízos existentes.

Como falantes galegos o coñecemento do portugués contribúe a mellorar  a competencia lingüística na nosa lingua ademais de ampliar considerablemente os nosos horizontes.

O acordo asinado o pasado febreiro entre os gobernos galego e portugués en materia lingüística pretende promover o coñecemento da nosa lingua irmá e por este motivo introducirase como lingua optativa a partir do vindeiro curso.

Obradoiro de Banda Deseñada con Xosé Tomás

Vén un mes cargado de actividades e talleres e aínda que a nosa intención era ilos facendo de a pouco a realidade quixo que abril se transformase no mes dos obradoiros.

Hoxe o turno foi para Xosé Tomás; ilustrador e debuxante, ademais de profesor de ensino secundario, que realizou un obradoiro en banda deseñada con alumnos de 2º de ESO e do Clube de Lectura de Cómic que coordina a profesora Montse Bragado.

A súa obra sitúase na ilustración infantil e xuvenil, con títulos como O caderno azul (Xerais, Vigo), El niño que tenía miedo de los robots / El robot que tenía miedo de los niños (Edebé, Barcelona) María é Maior (Baía, A Coruña), O pirata Metepata (Baía, A Coruña), Sabeliña e os ratos (Galaxia, Vigo) e outros moitos...

Tamén é autor da novela gráfica Nómades (Galaxia), artellada sobre breves pero reveladores episodios que teñen como fío condutor a emigración e como protagonistas a mulleres de diferentes idades e condicións. 

Ademais fai humor gráfico para as revistas Tempos Novos e a Revista Galega de Educación. Traballa igualmente o cartelismo didáctico, e estende o seu labor ao mundo dos materiais multimedia. Imparte con regularidade talleres de ilustración e cómic en centros de ensino e colabora na formación dos docentes nos usos didácticos do cómic e a ilustración.

Por último,  os alumnos tiveron que poñer en práctica todo o aprendido e, a dicir polos resultados, parece que non se foron de baleiro

Carlos Negro "Penúltimas Tendencias"

Acompañado dunha maleta estampada con flores chegou Carlos Negro ao noso instituto. Nela traía dende un pano rosa a unha Barbie. Tampouco faltaban caderniños de notas, revistas ou debuxos. Todo isto conforma Penúltimas tendencias, un poemario que racha esquemas.

Nun encontro co alumnado de 2º de ESO e organizado conxuntamente coa Biblioteca, o autor dialogou sobre a poesía e botou unha ollada sobre os modelos de beleza e de conduta que imperan na sociedade.

O libro é unha crítica á reprodución de roles tradicionais que manteñen as mulleres presas de instrumentos de control como o imaxinario do amor romántico.

O poemario fálanos dunha rapaza que quere ser ela mesma, alguén auténtico, que pensa, que loita contra a manipulación social do fashion, cool, chic e sexy. Non lle gusta este universo que fere sen compaixón, pois ela quere ser, por riba de todo, persoa. 

Obradoiro de poesía con Carlos Negro from ENDL Poio on Vimeo.

SÉS

Como xa vos comentaramos hai uns meses, “Cántamo en Galego” é un espazo musical radiofónico no que cada luns, coñecemos  todas as novidades dentro da produción musical en galego: discos, concertos, certames, festivais, eventos...

Dentro deste proxecto, periodicamente se desenvolven encontros con cantantes  e grupos da escena musical galega onde os asistentes poderán preguntar todo aquilo que desexen ou satisfacer algunha curiosidade.

Este xoves 16 de Abril tócalle o turno a Sés, unha das cantantes con máis éxito do noso panorama musical e que está  a facer concertos non só dentro da nosa xeografía senón tamén no exterior.

Agora está a presentar o seu terceiro traballo "Tronzar os valos" e que porá en escena o vindeiro 24 de abril no Teatro Principal de Pontevedra. Non  a perdades!

Máis información en: http://www.mariaxosesilvar.com/#about

e https://www.facebook.com/mariaxosesilvar

Xuízo na Audiencia Provincial

O alumnado de 2º de Bacharelato, e que cursa a materia de Ética e Filosofía do Dereito, asistiu o pasado martes 17 de marzo a un xuízo na Sección Segunda da Audiencia de Pontevedra. 

Esta actividade que realizamos en colaboración co departamento de Filosofía e o Gabinete de Normalización Lingüística da Audiencia, serve para achegar e dar a coñecer o funcionamento da xustiza e o uso que da lingua galega se fai neste ámbito, onde resta moito camiño por andar.

 

A vista era un xuízo por lesións pero acabou suspendido porque a defensa solicitou un novo informe. 

O presidente da Sección, Xosé Xoán Barreiro, conversou cos alumnos e explicoulles o papel que realizaban cada un dos actuantes no xuízo: o fiscal, a defensa ou a acusación particular