Fotografíando o lugar

Aquí deixamos unha selección das mellores 10 instantáneas presentadas ao concurso "Fotografía o teu lugar" que organizamos por vez primeira desde o Equipo de Normalización Lingüística en colaboración coa concellería de cultura do Concello de Poio. Parabéns a todos os que enviastes as vosas fotografías e colaborastes con esta iniciativa.

Noraboa ás alumnas/os: Paula Crespo, Sheila González, Lidia Pereira, Belén Pérez,  Mª Serantes Quiñones, David Villaverde e Jaime Pérez.

Caxade. Imperdible!

Esta fin de semana terá lugar na cidade do Lérez o Culturgal, e dentro da súa programación un dos seus pratos fortes será Caxade;  o novo proxecto persoal de Alonso Caxade. Algo que non vos podedes perder. Indie-folk cun arrecendo a música minimalista e a sons bucólico-pastorís da vella Europa. 

Caxade, que naceu no ano 2012 como un proxecto audiovisual transgresor é hoxe unha realidade consolidada dentro do panorama musical galego.

Música elegante, modesta e sinxela, surrealismo pós-modernista e discurso reivindicativo, metafórico e irónico.

A ESMORGA

O pasado venres 21 estreouse nos cines de toda Galicia a tan esperada adaptación dunha das obras máis senlleiras da Literatura Galega, A Esmorga. 

A película de Ignacio Vilar, baseada no libro de Eduardo Blanco Amor, narra a “crónica tensa e intensa de vinte e catro horas na vida de tres homes, compañeiros de esmorga que, deixando un regueiro de destrución e sexo equívoco e reprimido, van fechando portas tras si e guindando coas chaves, como para non querer volver, tal coma se adrede camiñaran cara á súa perdición”.

O FEO

O venres 21 os alumnos de 3º ESO asistiron á representación da compañía Catrocadeiras que puñan en escea a súa primeira montaxe titulada O FEO, do dramaturgo alemán Marius Von Mayenburg.

Unha comedia cargada de mensaxe e máis nos tempos que corren onde rendemos pleitesía a todo o que ten que ver coa imaxe.

Ao final da obra,  tanto os actores como o director conversaron co público e comentaron algunhas claves de como traballaron o texto, os personaxes ou a posta en escea. 

O elenco desta montaxe está formado por: Machi Salgado, Laura Campos, Manuel Polo e Xoán Abreu e está dirixida por Juan Carlos Corredoira.

Lette considérase unha persoa normal. Traballa duro como enxeñeiro e goza dun matrimonio apacible, sen sobresaltos. Mais un día descobre unha terrible verdade: é espantosamente feo. 

Realmente foi unha proposta interesante e fresca dentro do panorama teatral galego á que lle desexamos moito éxito e un longo percorrido.

O Feo Promocional from CatroCadeiras Producións on Vimeo.

Aplicación do Dicionario da Real Academia Galega para o móbil

Queremos dar a coñecer a aplicación do dicionario de Lingua Galega que a  Real Academia Galega vén de publicar na Play Store. Unha ferramenta, totalmente gratuíta e libre de publicidade, que leva aos nosos smartphones e tablets arredor de 50.000 termos coas súas definicións, sinónimos, antónimos, exemplos e pronuncia da maioría das entradas. É unha ferramenta pensada para o día a día das persoas que falan e escriben en galego e pode ser de grande axuda no mundo educativo.

A “app” funciona sen necesidade de estar conectada. (Apenas a pronuncia dos termos, conxugador verbal e a Palabra do Día requiren ligar cunha rede wifi ou 3G).

O deseño é tremendamente intuitivo e sinxelo e conta coa posibilidade de gardar termos nos nosos favoritos para telos máis accesibles ou compartir as definicións nas redes sociais. 

Deixámosvos unha pequena guía, elaborada pola profesora Paz Fernández Pereiro, de como descargar esta aplicación nos nosos móbiles.

Clica aquí para ver as instrucións

MAGOSTO 2014

O pasado 7 de Novembro o tempo deunos unha mínima tregua e poidemos festexar a nosa tradicional festa do Magosto. 

A palabra magosto designa  a propia fogueira na que se asan as castañas e era unha festa de orixe pagá, relacionada coa fecundidade e o folclore do lume que marca o paso dos ciclos agrícolas, a modo de simbolismo de peche do ciclo solar. Como aconteceu con outras festividades pagás, terminou sendo cristianizada asociándoa ós Santos e Defuntos ou a San Martiño.

Aínda que é tamén costume aproveitar esta data para probar o viño novo, nós preferimos adicarnos a xogar e a divertirnos con xogos antigamente moi populares pero que ultimamente temos algo esquecidos como: a corda, o pano, a petanca, carreiras de sacos ou os birlos.

Como se pode comprobar pasámolo en grande e como aínda estamos en tempo e o San Martiño está aí, que non falten CASTAÑAS.

Acabáronse as vendimas

e veñen as esfolladas,

para comer coas mozas

catro castañas asadas.

GHALEGHO

Deixámosvos aquí un vídeo que está  sendo toda unha sensación na rede e que reivindica un xeito de falar en galego e que durante anos foi menosprezado.

Apenas 2 minutos que están dando moito que falar. Parabéns  aos seus creadores!

Cántamo en galego

“Cántamo en Galego” é un novo espazo musical radiofónico no que cada luns, durante o programa Pontevedra na Onda, coñeceredes todas as novidades da produción musical en galego: discos, concertos, certames, festivais, eventos...

Como mostra aquí tendes o último traballo de Tempo Catro:  “Os ollos que falan. 11 cantares galegos” 

Na seguinte ligazón podedes escoitar a emisión do luns 20 de outubro.

Como cho digo ;-)

Cremos que os medios de comunicación non son conscientes das repercusións e dos efectos que teñen na sociedade que eles publiquen ou non novas en galego. E non só falamos de novas de temas xerais: internacional, deportes... tamén parece que perciben pasividade social cando publican, traducidas ao castelán, novas sobre notas de prensa redactadas en galego, declaracións de persoas feitas en galego ou novas sobre o uso do galego na sociedade.

A ocultación sistemática do galego nos medios de comunicación é unha práctica xeral e desafortunadamente existen moitos exemplos que poñen de manifesto este problema. O último exemplo é a Campaña Proba en Galego que o servizo de Normalización Lingüística do Concello de Pontevedra está a poñer en marcha e onde algún medios de comunicación déronlle difusión traducindo a nova en castelán, cando loxicamente toda a documentación achegada fora facilitada en galego.

Debemos esixir unha maior visibilización do uso do galego nos medios e atallar estas prácticas aínda moi estendidas.

Súmate á campaña  "Como cho Digo, pola visibilización do galego na comunicación"

Podes vela neste enderezo.

Concurso "Fotografía o teu lugar"

O ENDL do IES de Poio comeza o curso animando a todas aquelas persoas  que lles guste a fotografía ou simplemente teñen algo que contar cunha imaxe a participar neste concurso fotográfico " Fotografía o teu lugar".

Os traballos seleccionados empregaranse para ilustrar o calendario 2015 que promove o Equipo de Normalización e Dinamización Lingüística.

BASES

      -     Poderán participar todos os alumnos do IES de Poio

-     Cada participante pode presentar un máximo de 3 fotografías en formato dixital.

-    Poderanse empregar para a realización das fotografías tanto cámaras dixitais coma teléfonos móbiles ou tablets.

-    Os traballos deberán ser orixinais e inéditos

-   Non poderán aparecer datos persoais do autor no traballo que se entregue. Os datos deberán ir nun arquivo adxunto.

-   Entre os criterios a valorar polo xurado están: a orixinalidade, a calidade artística, a mensaxe  que se quere transmitir.

PRAZO E PRESENTACIÓN DOS TRABALLOS

-    O prazo de presentación dos traballos REMATA O DÍA 20 DE NOVEMBRO

- Os traballos enviaranse por correo electrónico nun arquivo ao enderezo: titoria2c@gmail.com

-    Ademais, nun documento adxunto deberá figurar o nome do autor e curso en que está matriculado

                       1º PREMIO: Cámara Dixital

          

Revista Trahamunda

Despois de varios anos de silencio, sae un novo número da revista Trahamunda, para contar todo aquilo que se fixo no noso instituto durante este curso que agora chega ao seu fin. Agardamos que a desfrutedes e que poidamos darlle continuidade o vindeiro curso. 

Non queremos desaproveitar a ocasión para agradecer a todas aquelas persoas que colaboraron nas actividades programadas polo Equipo de Normalización e Dinamización Lingüística  este ano, especialmente ao profesor Carlos Nuñez que mantén viva a voz de Radio Patio. 

Tamén agradecer as colaboracións de todos e todas que fixeron posible a edición desta nova Trahamunda e, sobre todo, ao profesor Paco Recamán pola súa inestimable axuda no deseño e na maquetación.

Teatro de Títeres en Poio

Despois de meses de ensaios, de construír e vestir os bonecos, elixir as músicas e repetir unha e outra vez cada escea chegou o día.

E para a estrea veu nada máis e nada menos que un público moi esixente. Os alumnos das escolas infantís do concello de Poio achegáronse e acompañáronnos neste emocionante momento.

Os e as alumnas Luana Cáceres, Carmen Martínez, Sergio Torres, Gabriel Rea, Laura Fernández e Carla Couselo puxeron voz e deron vida aos personaxes inventados por Daniel Vilela e o gran Javier Villafañe.

Podedes ver unha das obras que representamos: Felón o bandido e o manzaneiro troleiro.

Esta xa é a nosa 3ª montaxe, e seguro que non será a última!

De esquerda  a dereita: Sergio Torres, Gabriel Rea, Luana Cáceres, Carmen Martínez, Carla Couselo e Laura Fernández

Felón o bandido e o manzaneiro troleiro from ENDL Poio on Vimeo.

Saída Roteiro

Hoxe os alumnos de 4º de ESO  desafiamos ao tempo, puxémonos as botas e comezamos a camiñar polos sendeiros próximos como antes fixeron xa os nosos antergos, redescubrindo o noso pasado.

Os alumnos do Ciclo de Actividades físico-deportivas e os profesores de Educación Física acompañáronos neste percorrido onde descubrimos ermidas, muíños, fervenzas e lendas.

"Entre Nimbos" Homenaxe a Xosé María Díaz Castro

A noite é necesaria. Xose Mª Díaz Castro from ENDL Poio on Vimeo.

En colaboración co Departamento de música,  quixemos facer a nosa particular homenaxe ao poeta Xose Mª Díaz Castro co gallo da celebración do Día das Letras Galegas.

"Entre Nimbos" foi un espectáculo poético-musical onde alumnos e alumnas de todos os niveis da ESO e profesores interpretaron poemas do libro Nimbos e tamén doutros poetas galegos que foron obxecto deste día en edicións pasadas. 

As floriñas dos toxos . from ENDL Poio on Vimeo.

Ahí vén o maio from ENDL Poio on Vimeo.

Constrúe o teu truco

O ilusionismo é unha arte escénica e un espectáculo de habilidade e enxeño que consiste en producir efectos en apariencia marabillosos. Estes efectos fan parecer realidade o imposible. 

O mago Eloi quixo ensinarnos esas e outras cousas en dúas sesións de maxia de preto que realizamos o pasado día 14 de maio.

Ademais os propios alumnos construíron cunhas cartolinas e usando vellas cartas algún truco sinxelo. Uns con máis fortuna ca outros, xa que todo require certa destreza, levárono a cabo. O que si é seguro que o pasaron xenial.

Aquí vos deixo un pequeno video onde poderedes ver algún dos xogos que fixemos.

Obradoiro de maxia en galego "Constrúe o teu truco" from ENDL Poio on Vimeo.

Roteiro "Descubrindo o Noso".

Durante séculos os nosos antepasados crearon historias, cantigas ou lendas coa finalidade de entender o mundo, a vida e a morte. O Equipo de Normalización e Dinamización Lingüística do IES de Poio quere dar a coñecer para os alumnos e as xentes do noso concello todas esas lenda e historias próximas. 

Neste percorrido toparémonos con mouros, bruxas, trasnos e outros elementos relixiosos; así como muíños, castros, ermidas ou cruceiros que serven para manifestar as inquietudes e os xeitos de vida da nosa comunidade. Redescrubrir o NOSO é o mellor xeito de preservar e poñer en valor a propia cultura , a próxima, e conservala ao longo do tempo. Estamos aínda na fase de deseño do que será un primeiro roteiro cultural e natural por unha parte da parroquia de San Xoán de Poio e que realizaremos no vindeiro mes de xuño. 

Unha boa maneira de coñecer paso a paso a nosa historia e lugares agochados, fóra das rutas marcadas.

Pincha esta ligazón para ver o roteiro.

Galego, o paso adiante

Alumnos de 2º ESO A e 3º D participan con este traballo dentro do concurso de vídeo na nova edición de Correlingua 2014, que leva por lema: Galego, o paso adiante.

Galego, o paso adiante 2014. IES Poio from ENDL Poio on Vimeo.

As do Peixe

Casualidade ou non,  celebramos o Día Internacional do Teatro indo ver ao Pazo da Cultura de Pontevedra unha das obras gañadoras dos últimos Premios María Casares: As do Peixe.

Trátase dun texto de Cándido Pazó e dirixido por Cristina Domínguez baseado nos testemuños de ducias de mulleres que traballaron nalgunhas das conserveiras máis importantes do noso país e que hoxe están desaparecidas e con elas parte do noso patrimonio e pasado industrial.

A montaxe mestura o presente coa memoria destas mulleres, fiando a situación actual de descomposición do sistema con outra descomposición, con outra caída de certezas propias desta industria que para unha xeración de mulleres significou a entrada ao mundo laboral. As do peixe fura, dende o presente, nese pasado moi próximo e busca reflectir as circunstancias, non só das mulleres das conversas, senón tamén e dalgún xeito, das mulleres traballadoras. 

A obra divídese en “catro cadros” nos que as mulleres van lembrando a súa vida nesta industria, aínda que no texto tamén se coa os tempos ruíns dos nosos días. “Na obra, constantemente volvemos ao pasado, pero a situación actual está presente". 

O que contan as personaxes dos seus tempos lembra moito "ao que está sucedendo agora co traballo, coa descomposición do tecido empresarial, laboral, social”.

Catro traballadoras, catro intérpretes. Elas son Monica Camaño, Susana Dans, Rocío González e, loxicamente, Casilda Alfaro, que levou a cabo, xunto a Domínguez, o traballo de campo e as entrevistas. Elas catro poñen cara e voz a toda un segmento de traballadoras da historia de Galicia. 

Alumnos de 2º ESO coa mascota do Salón do Libro Infantil e Xuvenil de Pontevedra

Na entrada do Pazo da Cultura

Roteiro Castelao

Hoxe os alumnos de 4º de ESO desprazámonos a Pontevedra para coñecer algo máis da vida e da obra do artista rianxeiro, moi ligado á cidade do Lérez. Ademais serviunos para descubrir outra Pontevedra, un lugar tan próximo pero á vez non tan coñecido como pensabamos.

O itinerario, que parte da praza da Ferrería, abrangue non só parte da zona vella pontevedresa senón tamén algunhas das rúas que configuraban a vila de principios do século XX.

Detivémonos na Sala Castelao do Museo de Pontevedra, onde se conserva a meirande parte do seu legado artístico e contemplamos moitos dos seus debuxos e creacións que xa pasaron a formar parte da historia viva de Galicia.

Para máis información: Roteiro Castelao

Entroido 2014

		Festival entroido VER PRESENTACIÓN DESCARGAR TODO