Entroido 2015

Aínda que chovese non puidemos faltar ao Entroido. Botamos man dos disfraces, das pinturas, da purpurina....... Abrimos os caixóns agochados nos faiados e, sobre todo, démoslle voltas á cabeza procurando o mellor disfrace. Aquí van algunhas mostras!!!!!

Concurso Lingua de Namorar

Lingua de namorar é un concurso en liña de mensaxes de amor en lingua galega dirixido a todos os mozos e mozas de 14 a 35 anos, organizado pola Dirección Xeral de Xuventude e Voluntariado e pola Secretaría Xeral de Política Lingüística.

O obxectivo principal é dinamizar o uso da lingua galega entre a mocidade nas súas relacións persoais e nas novas tecnoloxías, nomeadamente en internet e na mensaxería instantánea.

Para participar no concurso, só tes que premer no botón "Envía as túas mensaxes" e cubrir o formulario. Ademais da mensaxe ou mensaxes, cómpre indicar os datos persoais e de contacto.

Podes ver as bases do concurso clicando nesta ligazón

Bravú XX

Durante 15 días  a exposición "Bravú XX. Tanta paixón quen poderá detela!”, cedida polo Servizo de Normalización Lingüística de Pontevedra, estará no  noso instituto para achegar ao alumnado este movemento musical e cultural que revitalizou a cultura galega nos anos 90 e do que saíron gran cantidade de bandas, músicos e artistas hoxe memoria viva da música galega.

"A noite Santos de 1994, nunha taberna de Viana, Chantada, naceu o bravú. Unha etiqueta creada polos propios músicos que serviu para bautizar o rock cantado en galego, magma vizoso que entón estaba a agromar por todo o país. Vinte anos despois cómpre lembrar o comezo desta aventura. Unha referencia cultural e unha proposta de traballo colectivo que as persoas máis novas teñen dereito a coñecer.

O bravú comezou sendo guitarra e distorsión, mais axiña estendeu o seu berro de vida por outros camiños. Nesta exposición queremos recoller ese proxecto de axitación xeral, alicercedunha tradición, e tamén impulso creativo para os novos tempos.

Como pregoábamos entón, vinte anos despois: tanta paixón quen poderá detela!"

Se queredes saber máis clicade nesta ligazón

Marcos Calveiro

Dentro dos encontros con escritores que imos ter ao longo do ano, o primeiro convidado  foi MARCOS CALVEIRO. Esta actividade, organizada conxuntamente coa Biblioteca, pretende establecer un diálogo entre autor e lectores e afondar nas obras lidas previamente polo alumnado, neste caso: “O pintor do sombreiro de malvas”, “Palabras de Auga” e “Todos somos”.

Alumnos e alumnas de 2º de ESO e 3º ESO puideron adentrarse no mundo persoal e literario deste autor e ver resoltas algunhas cuestións e dúbidas.

Algo máis dunha hora interesantísima que nos serviu para coñecer mellor o oficio de escribir. 

Roteiro Castelao

Meu estimado compatriota,

Non teño ningún documento, nin tan siquera unha partida de nascimento para acreditar a miña calidade de pontevedrés; pero se non fun consultado antes de nascer, sábese ben que des-pois de ter nascido escollín a Pontevedra para vivir e morrer, e se tal programa non chega a complirse non será certamente por culpa miña. Non son, pois, un pontevedrés de partida de nascimento, que ás veces esto é entrar pola porta falsa; eu son pontevedrés pola miña propia vontade e pola identificación coas terras e xentes de Pontevedra.

(...)

Así comezaba a carta que  Alfonso Daniel Castelao lle envía ao Presidente do Centro Pontevedrés de Bos Aires o 31 de marzo de 1947 e demóstranos o fondo sentimento de pertenza do escritor de Rianxo á cidade do Lérez.

Alumnos de 4º ESO percorreron as rúas da parte histórica da cidade, as prazas, o museo, o teatro Principal, Santa María imaxinando aqueles anos do escritor e a súa intensa actividade artística e política.

Máis información nesta ligazón

Todos ao cine!

Non é habitual irmos ao cine durante as clases pero esta semana tivemos a sorte de poder ver nun pase matinal nos cines de Pontevedra o filme de Ignacio Vilar, A Esmorga, e que está a dar moito que falar. 

A adaptación cinematográfica da novela de Blanco Amor protagonizada por Karra Elejalde, Miguel de Lira e Antonio Durán "Morris" segue emocionando aos espectadores galegos e cumpre xa a súa oitava semana na carteleira das principais cidades galegas, un dato histórico e impensable fai tan só uns meses para unha producción independente en V.O. en galego . Máis de 40.000 espectadores xa viron a fita en Galicia, e agora inicia o salto fóra coa estrea en Madrid para o mes de marzo.

Ademais, o filme faise cunha nominación, na categoría de Mellor guión adaptado, para Ignacio Vilar e Carlos Asorey e segue facendo historia ao converterse na primeira longametraxe rodada en galego que acada unha nominación ao prestixioso galardón. 

Entrega do Premio "Fotografía o teu lugar"

Por unhas cousas e outras fómonos retrasando pero ao final sempre cumprimos. Esta mañá a directora, Anxos Rial, fixo entrega do premio á gañadora do concurso "Fotografía o teu lugar", Paula Crespo de 1º de Bacharelato. 

A alumna recibiu o agasallo e que consistía, como non podía ser doutra maneira, nunha cámara dixital. Parabéns á gañadora e que siga a practicar a fotografía que, polos resultados, non se lle dá nada mal.

Día Internacional da Non Violencia e a Paz

Deixámosvos neste post o programa especial que alumnas de 1º e 2º de ESO fixeron dende Radio Patio  o pasado 31 de Xaneiro para conmemorar o Día Internacional da Non Violencia e a Paz. O son non é todo o bo que quixeramos pero aínda así queriamos compartir este momento con todos.