Teatro de Títeres

Como xa vén sendo tradición rematamos o curso coa posta en escena dunha nova montaxe de teatro de marionetas. Esta actividade que comezou a andar alá polo curso 2008-09 xa está plenamente consolidada e goza de grande éxito sobre todo entre o público miúdo. 

Alumnado do CEIP Isidora Riestra viñeron ver nesta ocasión tres obras clásicas de títeres de luva dos autores Javier Villafañe e Daniel Vilela; Chímpate Chámpata, O bosque da meiga Poucopelo e O roubo das pebidas de ouro, feitas polas alumnas Laura Fernández, Nicole, Lidia Alvariñas, Bibi Fernández, Carla Couselo, Laura Otero e Lucía González de 3º ESO, 4º ESO e 1º Bach.

Mi película from ENDL Poio on Vimeo.

O Roubo das Pebidas de Ouro from ENDL Poio on Vimeo.

chímpete chámpata from ENDL Poio on Vimeo.

Manuel María. Da tebra ao compromiso

Clausuramos o Mes das Letras cun recital poético-musical homenaxeando a Manuel María, facendo un percorrido pola súa produción poética dende os inicios ata as súas últimas composicións.

En colaboración co Departamento de Música, alumnos de 2º e 3º de ESO interpetaron varios temas e finalizaron co poema O Carro, musicado nos anos 70 polo grupo Fuxan os Ventos.

Escollemos 16 composicións do poeta chairego que combinaban poemas senlleiros como: Bando, Documentos Persoais, Terra Chá, O Pobo ou A Fala con outros menos coñecidos como: Cando o silencio é Tebra ou a Loita Final.

O carro from ENDL Poio on Vimeo.

Queremos Galego Videoclip

O IES As Barxas de Moaña volve sorprender unha vez máis a través da súa creatividade. Canta e baila pola lingua galega e presenta 'Queremos Galego', nova canción e videoclip elaborado no Obradoiro de Música, dirixido polo profesor  Seso Durán.

O videoclip enmárcase nunha destas iniciativas que pretenden servir para concienciar á mocidade da importancia de defender, e sobre todo, de empregar a lingua propia de Galicia. 

Como tantos outros temas de rap, a letra ten o seu lado reivindicativo: "É de xustiza dicir o que pasa; contar as verdades directas e francas; hai quen non quere que fales galego; non queren que fales na fala que falas".

Nesta ocasión, o Obradoiro Música As Barxas compuxo, gravou e editou o videoclip coa participación de alumnas e alumnos de 4º de ESO e Bacharelato. A través do rap de MC Jeremías e Seso Durán, contando tamén coa voz de Iván Maestú ‘Chiwi’, o alumnado reflexiona sobre a importancia da lingua en ‘Queremos Galego’.

Tamén participan Lucía Parcero, Iria Collazo, Claudia Antepazo, Lía Fernández, Tamara Rodríguez, Elena Fernández, Paula Martínez, Yanira Moldes e Seso Durán nos coros e o saxo de Lía Fernández. O vídeo está dirixido por María Cancelas e Aitana Sanz.

Dende  que penduraron o resultado en Youtube, o videoclip está a ser viral con miles de reproducións. Unha agradable sorpresa para a nosa lingua e cultura. 

Continuará o seu percorrido  participando en distintos festivais de audiovisual e desexámoslle todo o éxito que se merece.

Galicia, País das Letras

Grazas á colaboración co SNL do Concello de Pontevedra, chéganos esta actividade que pretende dinamizar o uso da lingua a través do xogo e do traballo en equipo.

A través dunha proposta en escena teatral e con formato de gran feirón, propónselles aos participantes unha serie de retos que van ter que superar de maneira rotatoria e cooperativa. 

As probas desta xincana buscan achegar contidos culturais relacionados coa lingua e a cultura galega dunha maneira participativa, lúdica e potenciando aspectos orais.

Os alumnos de 1º de ESO que participaron tiveron que realizar unha serie de probas que ían dende os xéneros literarios:teatro, narrativa e poesía e a creatividade literaria; as Letras Galegas e Manuel María ata o patrimonio cultural inmaterial: a música, tradición e literatura oral.

Exposición Manuel María

A Fundación Manuel María cedeunos temporalmente a exposición Manuel María, A Palabra Viva coa que queremos dar a  coñecer entre o noso alumnado a figura do gran poeta chairego.
Vinte e cinco paneis que repasan a historia, a personalidade e a obra literaria de Manuel María. Os paneis constan de imaxes, capas dos seus poemarios, textos manuscritos e fotografías que dan constancia da súa forte implicación no eido cultural e político de Galicia ao longo da súa dilatada vida.

Esta actividade vén sumarse a outras que se han de pór en marcha ao longo do mes  e que van dende obradoiros, recitais,  concursos ou  murais  que xiran arredor da figura do poeta de Outeiro de Rei.
Ademais xa temos as chapas que dende o ENDL de Poio deseñamos para homenaxear a Manuel María e que levan como lema os últimos versos do poema A Fala: "Precisamos a lingua se queremos vencer". 

Esperamos que vos gusten a tod@s.

Nómades. Obradoiro de Banda Deseñada

Nun mes cargado de actividades relacionadas coas nosas letras visitou o noso instituto un ano máis o ilustrador e debuxante Xosé Tomás. 

Nesta ocasión a idea era aprender as ferramentas básicas para levar unha historia ao papel da Banda Deseñada, tomando como fío condutor a obra de Nómades.

O alumnado de 3º ESO leu a obra e a partir dunhas preguntas como punto de partida  foron analizando a obra tanto dende a perspectiva narrativa coma formal.

Aprendemos da importancia da elipse, o emprego da cor, o proceso creativo e o máis interesante foi o constante debate e a contraposición das ideas e diversas lecturas que  subxacen da obra.

Tamén houbo algo de historia: como naceu o concepto de Banda Deseñada; que hai moitas temáticas dentro dela  e que tamén se poden transmitir moitas cousas a partir dos silencios e do que non se di.

Roteiro Literario polo Salnés

A bisbarra do Salnés foi berce de grandes escritores e por este motivo achegámonos a Vilanova de Arousa e a Cambados para percorrer a vida e obra de dúas importantes figuras da literatura galega e castelá: Ramón Cabanillas e Ramón Mª del Valle Inclán.

Monumento a Valle Inclán en Vilanova de Arousa

Os departamentos de Lingua e Literatura Galega e Castelá deseñaron esta actividade para o alumnado de 4º de ESO e así fixemos um roteiro polos lugares máis importantes da biografia valleinclanesca: a casa museo do autor, encadrada no fermoso Pazo do Cuadrante; a casa do Cantillo onde naceu ou a igrexa da Pastoriza.

Casa do Cuadrante

Casa do Cuadrante

Despois dirixímonos á vila de Cambados e  dende a Praza de Fefiñáns continuamos o percurso ata a casa natal de Cabanillas; unha humilde construción de estilo mariñeiro que alberga algúns documentos, discursos, fotos e primeiras edicións das obras do tamén chamado Poeta da Raza.

Casa natal de Ramón Cabanillas

Tamén a capital do albariño foi testemuña da vida de Valle Inclán e visitamos a que foi a súa casa na rúa Real para despois continuarmos camiño ata as fermosísimas ruínas de Santa Mariña,  camiño do miradoiro da Pastora, inmortalizado no poema do cambadés “As tardes na Pastora”.

Igrexa de Santa Mariña

Encallados

Se o ano pasado foi A Esmorga, nesta ocasión tivemos a sorte de recibir no centro a Alfonso Zarauza, director entre outros dos filmes: “A noite que deixou de chover”, “Os Fenomenos” ou de “Encallados”. Precisamente foi este último o que visionaron os alumnos de 4º de ESO e de 1º de Bacharelato que tiveron a oportunidade de intercambiar impresións co director e tamén preguntarlle todo tipo de dúbidas e curiosidades sobre o cinema galego, o proceso de creación ou mesmo sobre gustos cinematográficos.

Alfonso Zarauza

Alumnado durante o encontro

Encallados é unha longametraxe de 65 min, rodada en 16mm en branco e negro e que recrea as vivencias dun grupo de amigos em Compostela que tentan levar a cabo unha película co naufraxio do Prestige como fondo argumental. Unha comedia sobre o cine dende dentro, chea de autocrítica, humor e melancolia. O director fálanos do difícil que é levar adiante un proxecto e tamén que remate por chegar aos espectadores. 

Dende que rematou o filme, Encallados percorreu os teatros e auditorios de toda Galicia así como de centros culturais e asociacións para darlle visibilidade. Tamén conseguiu nos premios Mestre Mateo tres galardóns: mellor fotografia, mellor montaxe e mellor Película para Tv.

Encallados from Fernando Alfonsin on Vimeo.

Conversando con Ledicia Costas

Hoxe tivemos un encontro coa flamante gañadora do Premio Nacional de Literatura infantil e xuvenil en 2015, Ledicia Costas e veunos a falar do libro co que conseguiu este galardón: Escarlatina, a cociñeira defunta.

A autora leva no mundo literario dende hai máis de quince anos e aínda que publicou moito para o público infantil e xuvenil tamén posúe libros de literatura para adultos e de poesía.

Ledicia Costas

Entre outros títulos é autora de “Unha estrela no vento” (Xerais 1999), “O corazón de Xúpiter” (Xerais 2012), “Recinto Gris” (Xerais, 2014) ou ''Un animal chamado néboa'' (Xerais, 2015) coas que leva colleitados algúns dos premios literarios máis prestixiosos como o Merlín de literatura infantil e xuvenil, o Premio Lazarillo ou o Fervenzas Literarias e Neira Vilas.

Alumnos de 1º de ESO conversaron coa autora sobre algúns dos aspectos do libro e descubriron algunhas claves para comprendelo mellor como que a escarlatina era unha enfermidade mortífera, que ao avó da autora gustáballe inventar cousas ou como se inspirou para crear os personaxes de Dodoto, Amanito ou Lady Horreur.

Tamén lles adiantou algo da “precuela” que acaba de saír do prelo: Esmeraldina, a pequena defunta, onde nos narra a vida anterior da protagonista Escarlatina antes de viaxar ao Inframundo.

Ledicia Costas from ENDL Poio on Vimeo.

Club de Debate. Fase Local

Este sábado tivo lugar a fase local do Club de Debate que se desenvolveu no Salón de Actos do Pazo da Cultura de Pontevedra. Unha maratoniana xornada onde máis de sesenta alumnos e alumnas de sete institutos da bisbarra deron o mellor de si para defender a súa postura.

Concentrados antes de saír

Durante o 1º debate

O título deste ano: “Ser muller é vivir en desigualdade” serviu para pór sobre a mesa todas as cuestións que arrodean este tema: a construción social dos xéneros, a violencia machista, os roles, o sistema económico e toda unha serie de condicionantes que fan que aínda quede lonxe a igualdade.

O Club de Debate ten entre os seus obxectivos  fomentar o uso da lingua galega, mellorar as habilidades comunicativas  do alumnado, así como  o espírito de grupo e o traballo en equipo.

Daniel durante unha interpelación

Antía nas últimas conclusións

Repoñendo forzas antes da 2ª intervención

Parabéns aos alumnos e alumnas participantes e á profesora Montse Bragado que se prepararon a conciencia e  deixaron pegada en cada un dos debates.

Noraboa a Antía Otero, Daniel Quintillán, Alba Rosales, Paula Andrés, Laura Freijo, Tania Grande, Luís Quintela, Noemí Sartal, Gabriel Rea e Diego Piñeiro polo seu cuarto posto e meritoria participación.

Club debate from ENDL Poio on Vimeo.

Festival de Entroido

O entroido chegou sen avisar e tamén con moita chuvia ás costas. No instituto como vén sendo costume non quixemos faltar á cita e puxémonos a idear os disfraces e as coreografías para ese día.

Este ano quixemos darlle unha volta e decidimos que o entroido xirase arredor dun tema: O Cine.

Non todos se sumaron a esta idea pero a meirande parte dos grupos participantes tiraron de imaxinación.

Como novidade montamos no vestíbulo un photocall que foi todo un éxito... O "glamour" non pode faltar neste tipo de actos.

Logo tocaba o momento de saltar á escea... Os vencedores foron o grupo de 2º ESO que fixeron a súa particular Vendetta e de 3ºB, chamados Madagascar, que bailaron a ritmo de regetton. Noraboa a todos.

2º Premio: Madagascar

1º Premio: Vendetta

FESTIVAL DE ENTROIDO POIO from ENDL Poio on Vimeo.

Coñecendo a xustiza

Un novo ano, alumnado de 2º de Bacharelato que cursa a materia de Ética e Filosofía do Dereito, asistiu o pasado martes á Sala Segunda da Audiencia de Pontevedra para presenciar un xuízo.

Nesta ocasión tratábase dun xuízo por lesións e outro contra a saúde pública.

Fronte a Audiencia Provincial

Durante a vista os alumnos puideron coñecer os xeitos de proceder dos letrados e dos membros do tribunal e logo conversaron tanto cos avogados coma co xuíz Xose Xoan Barreiro.

Esta actividade que realiza o departamento de Filosofía e na que colaboramos xunto co Gabinete de Normalización Lingüística da Audiencia Provincial, serve para achegar e dar a coñecer o funcionamento da xustiza e o uso que da lingua galega se fai neste ámbito, que segundo o informe do Consello de Europa cómpre dunha maior presenza.

A este respecto o xuíz Xose Xoan Barreiro entende que se foron dando pasos neste sentido, apesar de que aínda resta moito camiño por andar.

Charla de David Amor

David López Veleiro, máis coñecido como David Amor, que na actualidade triunfa coa serie de TV "Gym Tonic",  veunos visitar e deunos a coñecer unha faceta persoal alonxada dos focos e do mundo da televisión.
Quixo compartir a súa experiencia vital e falar da importancia de ser nós mesmos e non poñernos límites para perseguir a felicidade. 

A necesidade de compartir e entre todos facer un mundo máis habitable, de sentirnos orgullosos do noso e en particular da nosa cultura foron outros temas que xurdiron na conversa onde propuxo algúns exemplos a seguir como Chris Hadfield que compartiu un tema de David Bowie dende a ingravidez espacial ou Dick Hoyt que conseguiu rematar un triatlón co seu fillo discapacitado.

Esta actividade foi realizada en colaboración co Departamento de Filosofía.

Charla David Amor from ENDL Poio on Vimeo.

Arrinca o Club de Debate 2016

Coa xornada de formación arrinca o Club de Debate, cuxa fase local se desenvolverá o vindeiro 20 de Febreiro no Auditorio do Pazo da Cultura de Pontevedra.

Dez alumnos e alumnas de 1º de Bacharelato do noso instituto participan xunto a outros 60  estudantes de sete centros de ensino na primeira fase desta edición, que terá en Carballo no mes de abril o seu punto final.

 

Na xornada de formación traballáronse diferentes aspectos en habilidades comunicativas (linguaxe verbal e non verbal, voz e entoación), deixar atrás medos e complexos e facer uso de todas as súas calidades e recursos para desenvolver calquera tema nun tempo limitado.

Esta actividade está promovida polos Servizos de Normalización Lingüística de diferentes concellos galegos (Pontevedra, Carballo, Rois, Santiago, Teo, O Carballiño, Ames e Negreira) quere ser un punto de encontro para a xente nova, unha oportunidade para coñecer a súa opinión sobre determinados asuntos e desmitificar a imaxe dunha mocidade pasiva e pouco implicada nos problemas da sociedade.

Defender ideas con palabras é unha forma de pór en valor as habilidades sociais tan necesarias hoxe en día e potenciar a nosa lingua como ferramenta indispensable para defender as nosas ideas.