Roteiro Literario polo Salnés

A bisbarra do Salnés foi berce de grandes escritores e por este motivo achegámonos a Vilanova de Arousa e a Cambados para percorrer a vida e obra de dúas importantes figuras da literatura galega e castelá: Ramón Cabanillas e Ramón Mª del Valle Inclán.

Monumento a Valle Inclán en Vilanova de Arousa

Os departamentos de Lingua e Literatura Galega e Castelá deseñaron esta actividade para o alumnado de 4º de ESO e así fixemos um roteiro polos lugares máis importantes da biografia valleinclanesca: a casa museo do autor, encadrada no fermoso Pazo do Cuadrante; a casa do Cantillo onde naceu ou a igrexa da Pastoriza.

Casa do Cuadrante

Casa do Cuadrante

Despois dirixímonos á vila de Cambados e  dende a Praza de Fefiñáns continuamos o percurso ata a casa natal de Cabanillas; unha humilde construción de estilo mariñeiro que alberga algúns documentos, discursos, fotos e primeiras edicións das obras do tamén chamado Poeta da Raza.

Casa natal de Ramón Cabanillas

Tamén a capital do albariño foi testemuña da vida de Valle Inclán e visitamos a que foi a súa casa na rúa Real para despois continuarmos camiño ata as fermosísimas ruínas de Santa Mariña,  camiño do miradoiro da Pastora, inmortalizado no poema do cambadés “As tardes na Pastora”.

Igrexa de Santa Mariña

Coñecendo a xustiza

Un novo ano, alumnado de 2º de Bacharelato que cursa a materia de Ética e Filosofía do Dereito, asistiu o pasado martes á Sala Segunda da Audiencia de Pontevedra para presenciar un xuízo.

Nesta ocasión tratábase dun xuízo por lesións e outro contra a saúde pública.

Fronte a Audiencia Provincial

Durante a vista os alumnos puideron coñecer os xeitos de proceder dos letrados e dos membros do tribunal e logo conversaron tanto cos avogados coma co xuíz Xose Xoan Barreiro.

Esta actividade que realiza o departamento de Filosofía e na que colaboramos xunto co Gabinete de Normalización Lingüística da Audiencia Provincial, serve para achegar e dar a coñecer o funcionamento da xustiza e o uso que da lingua galega se fai neste ámbito, que segundo o informe do Consello de Europa cómpre dunha maior presenza.

A este respecto o xuíz Xose Xoan Barreiro entende que se foron dando pasos neste sentido, apesar de que aínda resta moito camiño por andar.

No Ponteatro con Mofa e Befa

Dentro da programación de Ponteatro por onde pasaron e pasarán diversas compañías teatrais galegas como Voadora, Teatro do Morcego ou Teatro do Atlántico. Onte foi o turno de Mofa e Befa, que dende algún tempo nas súas montaxes colaboran co actor e director Quico Cadaval.

Alumnos e a alumnas de 4º de ESO foron ver e desfrutar a súa última montaxe, de grande éxito de crítica e público e que foi coproducida polo festival clásico de Almagro. 

Bobas & Galegas é un percorrido gozoso polos argumentos, ocupacións, preocupacións e industrias dos criados do século de Ouro, clase social que, de todos os traballadores manuais, foi a que contemplou dende máis cerca o poder, o seu ouropel, a súa erótica e a súa vaidade.

Un dúo cómico procedente dos límites da delincuencia, Mofa&Befa, foron detidos o ano pasado en Almagro tras inflinxir dolorosas feridas ao inmortal Shakespeare. Postos en liberdade por un erro xudicial, saen do cárcere onde os recluíra a crítica e regresan a Almagro para saciar a súa sede de vinganza. Quen é a víctima? O inocente teatro clásico español. 

Aproveitando o seu acento, fanse pasar por criados galegos e desgástanse cínicamente en xenuflexións e reverencias para gañarse a simpatía do público. No cárcere adquiriron unha enfermidade de transmisión textual que lles obriga a falar en verso. Tanto lles da a redondilla como o romance. Cales son as súas armas? Dous fouces de segador que cortan por igual os trigos e os tópicos. Poden transformarse, para lograr os seus fins, en anxos ou demos, cabaleiros ou bufóns, bobas ou galegas.

Mofa & Befa é un comando de comedia contemporánea que comprobou as súas armas nos máis hostís campos de batalla como bares, universidades, festivais vascos e/ou de teatro clásico, resultando sempre con simples rabuñaduras ou feridas leves.

Correlingua 2015

Pontevedra pechou nesta ocasión a edición 2015 do Correlingua que se desenvolveu ao longo do mes de maio en doce bisbarras galegas.

Esta proposta de carácter lúdico-educativo busca que os mozos participen nun acto público para reivindicar o dereito a crecer en galego. A carreira finalizou cunha festa final na Praza da Ferrería conducida polo cantante Xurxo Souto, de Os Diplomáticos deMonte Alto, e coa actuación musical do grupo Bocinazo que fixo versións de distintos temas, entre eles, 'A ritmo de garaxe' de Loquillo.

Xuízo na Audiencia Provincial

O alumnado de 2º de Bacharelato, e que cursa a materia de Ética e Filosofía do Dereito, asistiu o pasado martes 17 de marzo a un xuízo na Sección Segunda da Audiencia de Pontevedra. 

Esta actividade que realizamos en colaboración co departamento de Filosofía e o Gabinete de Normalización Lingüística da Audiencia, serve para achegar e dar a coñecer o funcionamento da xustiza e o uso que da lingua galega se fai neste ámbito, onde resta moito camiño por andar.

 

A vista era un xuízo por lesións pero acabou suspendido porque a defensa solicitou un novo informe. 

O presidente da Sección, Xosé Xoán Barreiro, conversou cos alumnos e explicoulles o papel que realizaban cada un dos actuantes no xuízo: o fiscal, a defensa ou a acusación particular

Roteiro Castelao

Meu estimado compatriota,

Non teño ningún documento, nin tan siquera unha partida de nascimento para acreditar a miña calidade de pontevedrés; pero se non fun consultado antes de nascer, sábese ben que des-pois de ter nascido escollín a Pontevedra para vivir e morrer, e se tal programa non chega a complirse non será certamente por culpa miña. Non son, pois, un pontevedrés de partida de nascimento, que ás veces esto é entrar pola porta falsa; eu son pontevedrés pola miña propia vontade e pola identificación coas terras e xentes de Pontevedra.

(...)

Así comezaba a carta que  Alfonso Daniel Castelao lle envía ao Presidente do Centro Pontevedrés de Bos Aires o 31 de marzo de 1947 e demóstranos o fondo sentimento de pertenza do escritor de Rianxo á cidade do Lérez.

Alumnos de 4º ESO percorreron as rúas da parte histórica da cidade, as prazas, o museo, o teatro Principal, Santa María imaxinando aqueles anos do escritor e a súa intensa actividade artística e política.

Máis información nesta ligazón

Todos ao cine!

Non é habitual irmos ao cine durante as clases pero esta semana tivemos a sorte de poder ver nun pase matinal nos cines de Pontevedra o filme de Ignacio Vilar, A Esmorga, e que está a dar moito que falar. 

A adaptación cinematográfica da novela de Blanco Amor protagonizada por Karra Elejalde, Miguel de Lira e Antonio Durán "Morris" segue emocionando aos espectadores galegos e cumpre xa a súa oitava semana na carteleira das principais cidades galegas, un dato histórico e impensable fai tan só uns meses para unha producción independente en V.O. en galego . Máis de 40.000 espectadores xa viron a fita en Galicia, e agora inicia o salto fóra coa estrea en Madrid para o mes de marzo.

Ademais, o filme faise cunha nominación, na categoría de Mellor guión adaptado, para Ignacio Vilar e Carlos Asorey e segue facendo historia ao converterse na primeira longametraxe rodada en galego que acada unha nominación ao prestixioso galardón. 

Roteiro "Descubrindo o Noso".

Durante séculos os nosos antepasados crearon historias, cantigas ou lendas coa finalidade de entender o mundo, a vida e a morte. O Equipo de Normalización e Dinamización Lingüística do IES de Poio quere dar a coñecer para os alumnos e as xentes do noso concello todas esas lenda e historias próximas. 

Neste percorrido toparémonos con mouros, bruxas, trasnos e outros elementos relixiosos; así como muíños, castros, ermidas ou cruceiros que serven para manifestar as inquietudes e os xeitos de vida da nosa comunidade. Redescrubrir o NOSO é o mellor xeito de preservar e poñer en valor a propia cultura , a próxima, e conservala ao longo do tempo. Estamos aínda na fase de deseño do que será un primeiro roteiro cultural e natural por unha parte da parroquia de San Xoán de Poio e que realizaremos no vindeiro mes de xuño. 

Unha boa maneira de coñecer paso a paso a nosa historia e lugares agochados, fóra das rutas marcadas.

Pincha esta ligazón para ver o roteiro.

As do Peixe

Casualidade ou non,  celebramos o Día Internacional do Teatro indo ver ao Pazo da Cultura de Pontevedra unha das obras gañadoras dos últimos Premios María Casares: As do Peixe.

Trátase dun texto de Cándido Pazó e dirixido por Cristina Domínguez baseado nos testemuños de ducias de mulleres que traballaron nalgunhas das conserveiras máis importantes do noso país e que hoxe están desaparecidas e con elas parte do noso patrimonio e pasado industrial.

A montaxe mestura o presente coa memoria destas mulleres, fiando a situación actual de descomposición do sistema con outra descomposición, con outra caída de certezas propias desta industria que para unha xeración de mulleres significou a entrada ao mundo laboral. As do peixe fura, dende o presente, nese pasado moi próximo e busca reflectir as circunstancias, non só das mulleres das conversas, senón tamén e dalgún xeito, das mulleres traballadoras. 

A obra divídese en “catro cadros” nos que as mulleres van lembrando a súa vida nesta industria, aínda que no texto tamén se coa os tempos ruíns dos nosos días. “Na obra, constantemente volvemos ao pasado, pero a situación actual está presente". 

O que contan as personaxes dos seus tempos lembra moito "ao que está sucedendo agora co traballo, coa descomposición do tecido empresarial, laboral, social”.

Catro traballadoras, catro intérpretes. Elas son Monica Camaño, Susana Dans, Rocío González e, loxicamente, Casilda Alfaro, que levou a cabo, xunto a Domínguez, o traballo de campo e as entrevistas. Elas catro poñen cara e voz a toda un segmento de traballadoras da historia de Galicia. 

Alumnos de 2º ESO coa mascota do Salón do Libro Infantil e Xuvenil de Pontevedra

Na entrada do Pazo da Cultura

Roteiro Castelao

Hoxe os alumnos de 4º de ESO desprazámonos a Pontevedra para coñecer algo máis da vida e da obra do artista rianxeiro, moi ligado á cidade do Lérez. Ademais serviunos para descubrir outra Pontevedra, un lugar tan próximo pero á vez non tan coñecido como pensabamos.

O itinerario, que parte da praza da Ferrería, abrangue non só parte da zona vella pontevedresa senón tamén algunhas das rúas que configuraban a vila de principios do século XX.

Detivémonos na Sala Castelao do Museo de Pontevedra, onde se conserva a meirande parte do seu legado artístico e contemplamos moitos dos seus debuxos e creacións que xa pasaron a formar parte da historia viva de Galicia.

Para máis información: Roteiro Castelao