A praia das afogados

O ano pasado  falabamos da agardada estrea de "A Esmorga" que durante meses estivo nos cines galegos con grande éxito de público. Un filme 100% en galego e que esta semana pasada vén de recoller  tres galardóns no festival de cinema de Toulouse: ao mellor director, ao mellor actor ex aquo para “Morrís”, Karra Elejalde e Miguel de Lira e o premio á mellor fotografía.

 

Hai dúas semanas outro filme gravado na nosa terra e na súa meirande parte en galego acaba de estrearse nas salas de toda España, falamos da Praia dos Afogados; adaptación da exitosa novela homónima de Domingo Villar.

Sinopse: Unha mañá, o cadáver dun mariñeiro é arrastrado pola marea ata a costa. Se non tivese as mans atadas ás costas, Xusto Castelo sería outro dos fillos do mar que atopou a morte entre as augas mentres faenaba. Sen testemuñas nin pistas da embarcación do finado, o lacónico inspector Leo Caldas mergullarase no ambiente mariñeiro da vila, tratando de poñer en claro o crime.

Co difícil e caro que é facer cine nestes tempos é encomiable a aposta decidida por historias que forman parte xa do noso universo literario e que ademais sexa en galego a súa banda sonora.

O  filme, un drama de suspense, está dirixido por Gerardo Herrero e no que o escritor Domingo Villar tamén asina o guión. Se pinchas aquí podes ler a entrevista que con motivo da rodaxe da fita lle fixeron dende Sermos ao director.

Deixámosvos o trailer e convidámosvos a encher as salas.

A Praia Dos Afogados - TRAILER galego from Tornasol Films on Vimeo.

Concurso de Microrrelatos de misterio

Coñeces o conto máis breve da historia da literatura? Sabes que é posible crear mundos imaxinarios con tan só sete palabras? 
Acabas de chegar ao marabilloso mundo das historias do tamaño dun gran de area.... 


O Equipo de Normalización Lingüística do IES de Poio organiza un concurso de microrrelatos que xiran arredor do medo, do misterio ou do terror.
 
Que é un microrrelato?
O microrrelato é unha construción literaria narrativa cuxa principal característica é a brevidade. No microrrelato OS TÍTULOS ADOITAN SER PERTINENTES, PORQUE PODEN AXUDAR A COMPLETAR AQUILO QUE, POLA BREVIDADE, NON SE DI.
 

O único que tes que facer é crear o teu conto a partir dalgún destes principios:

1. “Antes de poñer o anel frotou o metal contra o peito...”
2. “Xa era medianoite e nada se movia....”
3. “ Un imán no frigorífico sostiña a nota...”

A data límite para a recepción dos traballos é o 29 de Outubro de 2015.
Haberá un 1º e un 2º  premio para os mellores relatos.  

Volve o outono

Aínda que non o pareza xa estamos no outono. Non chegaron as chuvias, nin tampouco o frío pero si comezamos a ver as castañas pola rúa. E no pequeno souto que temos tras o instituto xa se empezan a estender polo chan os ourizos.

Por iso xa estamos a preparar o magosto, que este ano virá con algunha que outra sorpresa nova. Un día de festa que este ano queremos que sexa a antesala do Samaín.

COME A LINGUA. Receitario de Sobremesas

Son moitas as horas que ao longo da nosa vida adicamos a comer e moitas máis a preparar eses alimentos que levamos á boca.

Come a lingua é un proxecto, coordinado polas profesoras Marta Taboada e Montse López, onde intercambiar saberes e información coa cociña como nexo común e tamén onde moitos pais e nais axudaron e se implicaron na realización dalgunhas destas receitas.

Este receitario de sobremesas é unha mostra do traballo realizado e degustado ao longo destes meses e que queriamos compartir coa esperanza de que sirva para realizardes algunha destas propostas.

Se queres podes descargalo AQUÍ

Bo apetito

Unha Parada no teatro

Este venres tivo lugar a estrea da obra A Parada, de Javier Portillo, representada polo alumnado de 3º ESO B  e dirixida pola profesora Carmen Redondo.

A Parada é unha comedia urbana chea de personaxes disparatados que nos van contando a súa vida mentres agardan nunha parada de autobús.

Queriamos agradecer á compañía de teatro "Lúa Chea " de Poio e a algúns dos seus membros a súa inestimable axuda ao achegarnos algún material de vestiario e decorados 

Colleitando Premios

Dende o ENDL do IES de Poio queremos darlle a noraboa a todos aqueles alumnos e alumnas que participaron en diferentes concursos de creación literaria e artística organizados por organismos, institucións e colectivos de fóra do noso centro. E en particular quixeramos nomear a aqueles que acadaron algún galardón,  como son:

Certame Literario Illa Couto (Concello de Poio)

- 1º Premio en Relato e Poesía (Categoría E): Carmen Ansín Vallejo (1º Bacharelato)

- 1º Premio en Relato (Categoría D): Daniel Otero Veloso (1º ESO)

 

III Certame de Banda Deseñada do IES Arcebispo Xelmírez I

- 2º Premio: Alba Jiménez e Mario Acuña

Poesía en Clave Dixital. Encontro poético

O pasado venres 15 de maio xuntámonos en Caldas de Reis máis de 200 alumnos de diferentes centros da provincia ( IES de Poio, Vilalonga, Sanxenxo e San Paio de Tui) dentro do proxecto "Poesía en clave dixital".

No encontro non faltaron a música nin os obradoiros, impartidos polas poetas Rosalía Fernández Rial e Susana Sánchez Aríns, que exerceu de madriña do acto. A guitarra de Sergio Trillo e a arpista Clara Pino completaron os actos dese día.
 

Tras o almorzo na Carballeira, realizamos un percorrido pola beira do río Umia e a zona vella de Caldas. Iniciamos as actividades da tarde coa interpretación de "Adiós ríos, adiós fontes". 

Os alumnos fixeron fotos do río para a creación de "Poemas visuais do Umia" e por último tamén se homenaxeou a Ramón Pérez de Ayala, que escribiu a súa novela "AMDG" durante a súa estancia no balneario de Caldas de Reis, coa lectura dun poema extraído desta obra. 

 O percorrido continuou pola zona vella da vila, ofrecendo versos e poemas aos viandantes e distribuíndo "publicidade poética" polos parabrisas dos coches. No remate, xa de volta á Carballeira, houbo un momento para a lectura dos poemas realizados polo alumnado no concurso de "Parodias musicais".

Aquí podes ver a noticia publicada nalgúns medios de comunicación